“Илһамлы каләм” Бөтенроссия конкурсы

         11 нче майда   Казан  федераль университеты  филология  һәм сәнгать институтының  актлар залында "Илһамлы каләм” Бөтенроссия иҗади  конкурсына нәтиҗәләр ясалды, җиңүчеләр бүләкләнде. Конкурста 332 укучы катнашты, шулардан 88 укучының эше 2 нче турга үтте. ТР Язучылар берлеге, "Бөтендөнья Татар Конгрессы” Башкарма комитеты, Казан  федераль университеты  филология  һәм сәнгать институты белән берлектә үткәргән әлеге мәртәбәле бәйгедә Мөслим районыннан да ике укучы катнашты һәм уңышка иреште. Тат Бүләр мәктәбенең 11 сыйныф укучысы  Гөлия Исламова (Җитәкчесе: Җәмилә Сәхбетдинова)  “Публицистика” номинациясендә 3 урынны яулады,  диплом белән бүләкләнде. Мөслим лицееның 11б сыйныфы укучысы Алмаз Ногуманов (Җитәкчесе: Чулпан Ситдыйкова ) конкурсның  “Рәхмәт хаты” на лаек  булды.

Кабатланмасын иде  сугышлар..

Кешелек дөньясы җинаятьчел фашистлар Германиясе тар-мар ителүнең 67 еллыгын тантаналы төстә билгеләп үтәргә җыена. Күпме генә вакыт үтсә дә, халык хәтерендә Бөек Ватан  сугышы илебез тарихында иң авыр, иң дәһшәтле сугыш буларак сакланыр. XX гасырның 40 нчы елларында безнең халкыбызның нинди зур батырлыклар кылганын хөрмәт һәм соклану хисләре белән сөйләрләр.

    Сугыш! Ул инде күптән күкрәп үтте. Менә 67 ел безнең күгебез һәрчак аяз. 

Мөслим лицеенда татар теле һәм әдәбияты атналыгы үтте

Атналык кысаларында түбәндәге чаралар уздырылды.

Китапханәче, татар теле укытучысы Э.Ситдыйкова тарафыннан якташ язучылар иҗатына багышланган китаплар күргәзмәсе куелды, “Үрнәк дәфтәр”, Г.Тукай әсәрләре буенча рәсемнәр, шигырь сөйләүчеләр  конкурсы үткәрелде.

 “Коръән Кәрим хикмәтләре”  темасына Татарстанда тарихи-мәдәни мирасны саклау елына багышланган әдәби кичә ,“Тукай безнең йөрәкләрдә” дип аталган  шигырь бәйрәме, “Тукай иҗатын беләсеңме?” 7-8 нче сыйныфлар өчен КВН  укучыларның күңеленә хуш килде. Татар теле укытучысы А.Латыйпова,10а сыйныфы укучысы Й.Хөрмәтуллина татар теле һәм әдәбияты укытучыларының Рәсәйкүләм форумында катнашып, алган тәэсирләре белән уртаклаштылар.

Туфан Миңнуллин вафат

2 май иртәсендә кайгылы хәбәр килде: Казан хастаханәсендә 77 нче яшендә  күренекле язучы, драматург, Татарстан дәүләт шурасы депутаты Туфан Миңнуллинның йөрәге тибүдән туктады.

Туфан Миннуллин

      Туфан абый тормышны ярата иде, эш сөючән, бер нәрсәгә дә битараф калмаган түзмәс җан иде. Үзеннән соң күпме әсәре калды! Ходай аңа талантын да, акылын да мулдан биргән. Зур фикер иясе иде ул. Аның "Кызыл тышлы дәфтәре"ндә теркәп барылган фикерләре, күзәтүләре, вакыйгалар - публицистиканың иң югары ноктасы.Бәхетле язучы, драматург буларак, аңа исән чагында басылган китапларын күрергә насыйп булды, классик әсәрләргә әверелгән сәхнәләштерелгән пьесалары белән дә халыкның күңелен яулады.Тормыш аны, ул тормышны өзелеп яратты. Кешеләрне ихлас сөйде, аларның яшәешләрен кайгыртты. Татарстан дәүләт шурасында ул һәрвакыт татар мәсьәләсен күтәреп килде, килеп чыкмаган мәсьәләгә көенде, шатлыклы вакыйга булса, балаларча сөенә белде.

Туфан абый, олы йөрәкле, милли җанлы шәхесебез, урының җәннәттә, рухың тыныч булсын.
Драматургны соңгы юлга озату, аның белән хушлашу 3 майда, иртәнге 9-да, Камал театрында булачак.