6 мар. 2013 г.

Электрон хезмәтләрне мәктәп укучылары популярлаштыра


06.03.2013
1 марттан алып халык арасында электрон хезмәтләрне популярлаштыру эше белән мәктәп укучылары да шөгыльләнә башлады. Шул рәвешле алар «IT-чемпион» бәйгесендә катнашып, өр-яңа iPad һәм башка кыйммәтле бүләкләр өчен баллар туплый.
«IT-чемпион» бәйгесе Мәгариф һәм фән, Татарстанның Мәгълүматлаштыру һәм элемтә министрлыклары тарафыннан Татарстан Президенты Рөстәм Миңнеханов һәм премьер-министр Илдар Халиков булышлыгы белән оештырыла. Аның максаты - балалар ярдәмендә Татарстанда тәкъдим ителә торган электрон хезмәтләрне популярлаштыру, халыкны әлеге порталдан файдалануга өндәү һәм, әлбәттә инде, укучыларда кечкенәдән үк актив гражданлык позициясе тәрбияләү.
Теркәлү уз да, укучыга җиңү яуларга ярдәм ит
Бәйге ике номинациядә оештырыла. Конкурсның «Иң актив укучы» дип атала торган өлешендә катнашырга теләүчеләр әти-әниләре, әби-бабайлары, туганнары, күршеләренә республиканың электрон хезмәтләр порталында теркәлү узарга ярдәм итәргә тиеш. Укучы ярдәмендә сайтта шәхси кабинетын булдырган һәркем үз битендә яшүсмернең «Татарстанда электрон мәгариф» мәгълүмати системасындагы шәхси логинын җыя һәм, шул рәвешле, жюри әгъзаларына үзенә кайсы укучы булышканлыгын ачыкларга ярдәм итә. Шулай итеп, укучы исеменә махсус баллар туплана башлый. Әгәр дә инде сайтта теркәлү узган өлкәннәр берәр төрле электрон хезмәттән файдалана икән, укучының җиңү мөмкинлеге бермә-бер арта.
Конкурсның бу этабы өч ай дәвамында барачак. Иң күп балл җыючыларга iPad һәм iPad Mini кебек кыйммәтле бүләкләр тапшырылачак. Шунысын да билгеләп үтү кирәк, бу бәйгедә җиңүчеләр саны республикага түгел, ә һәрбер муниципаль берәмлеккә берничә булачак. Җиңүчеләрне бүләкләү тантаналары да республиканың район һәм шәһәрләрендә уздырылыр, дип планлаштырыла.
Укучылар хөкүмәткә ярдәм итә
1 майдан исә мәктәп укучылары арасында «Татарстанның дәүләт һәм муниципаль хезмәтләр порталын камилләштерү» номинациясендә иҗади конкурс игълан ителә. «Бәйгенең бу өлешендә дә без яшь буенча чикләүләр кертмәдек. Шулай да, анда өлкән сыйныф укучылары гына катнашыр, мөгаен», - дип сөйләде Татарстанның мәгълүматлаштыру һәм элемтә министры Роман Шәйхетдинов журналистлар белән очрашуда. Ник дигәндә, бу конкурста катнашу өчен укучыларга электрон хезмәтләр порталын камилләштерүнең яңадан-яңа юлларын эзләргә, төрле кызыклы идеяләр тәкъдим итәргә, дизайн һәм программалаштыру буенча мөмкинлекләрен сынап карарга туры киләчәк.
Гомумән алганда, бәйгедә җиңелүчеләр бөтенләй дә булмаячак. Конкурста катнашкан һәрбер укучы үзе җыйган балларны күңеленә хуш килгән берәр төрле бүләккә алыштырып ала алачак. Хәзерге вакытта алар өчен футболка, флешка, магнит һәм башка истәлекле бүләкләр тәкъдим ителә. Иң актив укучылар өчен исә төрле кызыклы экскурсияләр, очрашулар, мастер-класс һәм башка кызыклы чаралар уздыру да каралган.
Шунысын да билгеләп китү кирәк, конкурс игълан ителеп, әле өч көн генә узуга карамастан, бүген балалар ярдәме белән барлыгы 2135 шәхси кабинет булдырылган инде.

«Intertat. Ru» материаллары буенча

Комментариев нет:

Отправить комментарий